ازاى تختار جهاز كشف اعطال لورشتك؟

ازاى تختار جهاز كشف الاعطال المناسب ليك ؟؟

فى المقال ده هنتكلم عن الطريقة الافضل لإختيار جهاز كشف الاعطال

*امكانياتك المادية ـــــــ الميزانية اللى انت محددها للجهاز كام؟ 

يعنى ممكن تلاقى اجهزة تبدأ من 1000 جنية لحد 300,000 جنية.

فعلا الفرق كبير كدة؟؟

ايوة فعلاً الفرق كدة .. يعنى ممكن تلاقى جهاز يكشف على نظام واحد

 وبيؤدى وظيفة واحدة زى قراءة العطل فقط لحد ما توصل لجهاز بيعمل كل حاجة متاحة فى العربية من تكويدات وتحديث سوفت وير .

ولكن لسه فى جزء مهم جداً فى النقطة دى,  الموضوع بيكون تدريجى بمعنى هتلاقى جهاز بيشتغل على 4 انطمة

وجهاز بيشتغل على انظمه اكثر شوية وجهاز بيكشف على كل انواع العربيات.

يعنى لو انت محترف ممكن تجيب جهاز بإمكانيات عاليه ولو برضو امكانياتك المادية مش متاحة ومحتاج جهاز بامكانيات كبيرة , فى شركات بتتيح

تقسيط الاجهزة فتقدر تاخد خطوة كويسة بمقدم بسيط،

وحتى الاجهزة الغاليه يتيح ليك امكانية انك تختار على قدر احتياجك ومش هتدفع غير اللى اختارته

 يعنى تجيب فيشة واحدة لماركة واحدة كبداية وسوفت وير  لماركة واحدة.

*انت شغال فى ايه ؟؟

فكر بالعكس, انت محتاج الجهاز لأية, انت هتشتغل بيه على عربيات نوعها ايه ؟؟

لو انت شغال كورى ويابانى فقط غير لما تكون شغال فى الكورى واليابانى والالمانى , غير لما تكون شغال فى الامريكى

غير لما تكون شغال فى كل الماركات.

اذا كل جهاز قوى فى بعض الماركات وضعيف فى بعضها ، وبالنسبة للاجهزة العامة دايما ليها نقاط قوة ونقاط ضعف،

فتقدر تستشير حد يكون خبرة وامين يوضحلك مدى ملائمة الجهاز لطبيعة شغلك

وبرده لو شغل فى العربيات القديمة نسبيا الامر هيفرق

لان بعض الاجهزة غير مزودة بالفيش الخاصة بالعربيات القديمة ، واذا كانت موجودة هتبقى بسعر اضافى

وفيه اجهزة بتنزل بفيش كاملة لكل العربيات .

*حاجات مهمة متعديش عليك..

زى رخصة السوفت وير وده لان بعض الاجهزة مبيشتغلش بعد انتهاء فترة الترخيص ،

يعنى رخصة سنة بعد السنة الجهاز هيقفل فانت تشوف هل ده هيناسبك ولا لا،

ايه سعر التحديث او الابديت؟ 

الامر التانى لو الجهاز ملوش رخصة محددة بوقت

 ده لان بعد سنة فى عربيات جديدة هتظهر انت مش هتقدر تشتغل فيها لو مش معاك السوفت وير الجديد

فى الحالة دى انت محتاج تعرف سعر التحديث قبل ما تشترى الجهاز او تعرف بيتيح ليك تحديث مجانى لمدة اد ايه؟

وكل ما كانت فترة التحديث المجانية اطول يبقى افضل بالطبع.

*واخيرا المكان او الشركة اللى هتشترى منهم؟

طب هل ده مهم؟؟

اه اكيد مهم جدا طبعا ..

انما المقصود مش حجم الشركة اللى هتشترى منها،

ولكن المقصود مدى الدعم الفنى اللى هيقدمهولك طول فترة استخدامك للجهاز

بمعنى الجهاز اللى حضرتك هتشتريه هيوفر امكانيات كتير جدا

مش هتقدر تستفيد منها لو محدش عرفك بيها ودربك عليها كويس.

يعنى مبدئيا لازم يكون هو اصلا محترف وفاهم جدا ويكون فى اتفاق الشراء اتفاق على التدريب 

وتكون ناس محترمة وليها مكان واسم علشان تقدر تطمن على الضمان.

طيب ولو عطلت بعد ما خدت التدريب هل هيقدمولك دعم فنى ولا هيسيبوك؟

الحاجات دى بتفرق معاك جدا فى تطور اداءك واستفادتك بالجهاز.

وفى النهايه شرائك لمعده هو استثمار لازم تكون متأكد انك حطيت استثمارك فى المكان الصح

وبالتالى انت محتاج شركة توضحلك ما يناسب احتياجاتك الفعليه قبل ما تاخدالقرار

ولضمان ان يصلك عائد مناسب فلازم تركز فى كل العوامل دى.

والله الموفق..